សកម្មជនបរិស្ថានព្រួយបារម្ភថា គម្រោងបង្កើតរោងចក្រផលិតស៊ីម៉ងត៍ នឹងធ្វើឱ្យមានផលប៉ះពាល់ធ្ងន់ធ្ងរ ដល់ជីវចម្រុះដ៏សម្បួរបែបនៅក្នុងតំបន់ព្រៃឡង់ ហើយវាអាចបង្កជាជម្លោះរវាងក្រុមហ៊ុន ជាមួយក្រុមពលរដ្ឋដែលរស់នៅជុំវិញតំបន់ព្រៃឡង់។
ប្រធានកម្មវិធីបណ្តាញ និងតស៊ូមតិ នៃអង្គការភាពជាដៃគូដើម្បីបរិស្ថាន និងការអភិវឌ្ឍលោក សាន់ ម៉ាឡា បានប្រាប់អាស៊ីសេរីនៅថ្ងៃទី១៣ឧសភាថា ការកាត់ដីចេញពីដែនជម្រកសត្វព្រៃព្រៃឡង់ ទៅបង្កើតរោងចក្រផលិតស៊ីម៉ងត៍ មិនមែនជាគោលនយោបាយឆ្លាតវៃទេ។ លោកបន្តថា រដ្ឋាភិបាលគួរតែងាកទៅប្រើប្រាស់ផ្ទៃដីទំនេរដែលសេសសល់ ជាជាងទៅឈូសឆាយបំផ្លាញព្រៃធម្មជាតិ ដើម្បីយកដីអភិវឌ្ឍ។
កន្លងមក យើងតែងតែឃើញគំរូមិនល្អ ដែលកើតចេញពីគម្រោងផ្ដល់ដីសម្បទានសេដ្ឋកិច្ច ដូចជាការបន្សល់ទុកនៅទំនាស់ដីធ្លី វិវាទរវាងក្រុមហ៊ុនអភិវឌ្ឍន៍ និងប្រជាពលរដ្ឋមូលដ្ឋាន ដែលពួកគាត់ធ្លាប់តែអាស្រ័យផលទៅនឹងតំបន់ព្រៃឈើទាំងអស់នោះ។
— លោក សាន់ ម៉ាឡា
ការលើកឡើងនេះ ធ្វើឡើងបន្ទាប់ពីមានអនុក្រឹត្យមួយចុះហត្ថលេខាដោយលោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១៣ ខែមករា ឆ្នាំ២០២៥ សម្រេចកាត់ដី៩៩ហិកតារ នៅក្នុងដែនជម្រកសត្វព្រៃព្រៃឡង់ ស្ថិតក្នុងឃុំបឹងចារ ស្រុកសំបូរ ខេត្តក្រចេះ ប្រគល់ឱ្យក្រុមហ៊ុន ខេ ភី ស៊ីមេន អ៊ិនដាសស្ទ្រី (K.P Cement Industry Co.,Ltd) ដែលគេដឹងថាជាក្រុមហ៊ុនចិន សម្រាប់វិនិយោគបង្កើតរោងចក្រផលិតស៊ីម៉ងត៍។
កាលពីអំឡុងឆ្នាំ២០២៣ ក្រុមហ៊ុន ខេ ភី ស៊ីមេន អ៊ិនដាសស្ទ្រី និងក្រុមហ៊ុន ឆាយណា អេនើជី ខនស្ដ្រាក់សិន អ៊ិនធើណេសិនណល គ្រុប (China Energy Costruction International Group Co,Ltd) បានជួបជាមួយមន្ត្រីរដ្ឋាភិបាលដើម្បីស្វែងរកឱកាសវិនិយោគផលិតទឹកស្អាត និងបង្កើតរោងចក្រផលិតស៊ីម៉ងត៍។
បណ្ដាញសហគមន៍ព្រៃឡង់នៅខេត្តក្រចេះលោក ស្វាយ សុង បានលើកឡើងថា សហគមន៍នៅមិនទាន់ប្រទះឃើញក្រុមហ៊ុនចិននេះ ចូលទៅបង្កើតរោងចក្រស៊ីម៉ងត៍នៅក្នុងតំបន់ព្រៃឡង់នៅឡើយទេ។ ប៉ុន្តែលោកថា សហគមន៍បានឭដំណឹងតៗថា ក្រុមហ៊ុននេះ គ្រោងចូលទៅវិនិយោគបង្កើតរោងចក្រនៅក្នុងចំណុចកំបោរជ្រោង ស្ថិតក្នុងដែនជម្រកព្រៃឡង់ ដែលជាតំបន់ព្រៃឈើក្រាស់មានដើមឈើតូចធំ និងមិនមែនជាតំបន់ព្រៃរេចរឹលនោះទេ។
ពួកខ្ញុំជាបណ្ដាញសហគមន៍ព្រៃឡង់ ព្រមទាំងប្រជាពលរដ្ឋមួយចំនួនធំ ព្រួយបារម្ភ ព្រោះការសាងសង់ ឬការវិនិយោគឱ្យក្រុមហ៊ុនហ្នឹង។ ពួកខ្ញុំស្ដាយ ព្រោះតំបន់ហ្នឹង ជាតំបន់ការពារនិងអភិរក្សរបស់ព្រៃឡង់។
— លោក ស្វាយ សុង
ជុំវិញបញ្ហានេះ អ្នកជំនាញគោលនយោបាយផ្នែកសិទ្ធិមនុស្ស និងបរិស្ថានលោក ហេង គឹមហុង ស្នើឱ្យរដ្ឋាភិបាលគួរបង្ហាញរបាយការណ៍ជាសាធារណៈ ស្ដីពីផលប៉ះពាល់ នៃការផ្ដល់ដីក្នុងដែនការពារព្រៃឡង់មុននឹងប្រគល់ ឱ្យក្រុមហ៊ុនឯកជនយកទៅអភិវឌ្ឍ។ លោកបន្តថា រដ្ឋាភិបាលត្រូវបង្ហាញពីតម្លាភាព ជុំវិញកម្រិតផលប៉ះពាល់ដល់ជីវៈចម្រុះ និងប្រាប់ពីទីតាំងដីព្រៃប្រគល់ទៅឱ្យក្រុមហ៊ុន ដើម្បីកុំឱ្យមានការខ្វែងគំនិតគ្នារវាងរដ្ឋាភិបាលជាមួយពលរដ្ឋ។
បើសិនជាទំហំនៃផលប៉ះពាល់ វាធំពេក វាធ្ងន់ធ្ងរពេក ខ្ញុំគិតថា ប្រហែលជាត្រូវជជែកគ្នាឡើងវិញដែរ។ ប្រសិនបើ ការសិក្សារកឃើញថា ទីនោះជាតំបន់ព្រៃសឹករេចរឹលហើយ ពុំមែនជាតំបន់សំខាន់ នៃការអភិរក្សនិងការពារទេ។ ការអភិវឌ្ឍ ក៏វាទំនងចំណេញទៅដល់ប្រជាពលរដ្ឋ ឬក៏ចំណេញទៅដល់សេដ្ឋកិច្ចជាតិ។
— លោក ហេង គឹមហុង
ដែនជម្រកសត្វព្រៃព្រៃឡង់ ទំហំជាង៤សែន (៤៣១,៦៨៤) ហិកតារ ស្ថិតនៅក្នុងខេត្តចំនួន៤ គឺកំពង់ធំ ក្រចេះ ស្ទឹងត្រែង និងព្រះវិហារ ត្រូវបានរដ្ឋាភិបាលកំណត់ជាតំបន់ការពារនិងអភិរក្សតាំងពីឆ្នាំ២០១៦។ ប៉ុន្តែ សហគមន៍ជនជាតិដើមភាគតិច និងក្រុមយុវជនបរិស្ថាន ចុះរកឃើញថា ព្រៃឡង់បន្តរងការកាប់បំផ្លាញគួរឱ្យព្រួយបារម្ភ។ ចំណែកទិន្នន័យពីអង្គការឃ្លាំមើលព្រៃឈើសាកល (Global Forest Watch) កាលពីឆ្នាំ២០២៣ បង្ហាញដែរថា គិតចាប់ពីឆ្នាំ២០១៨មក ព្រៃឡង់ជាង៤ម៉ឺន៨ពាន់ (៤៨,៧៤០) ហិកតា ត្រូវបានបាត់បង់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។