អ្នកនាំពាក្យក្រសួងការពារជាតិអ្នកស្រី ម៉ាលី សុជាតា បានថ្លែងនៅក្នុងសន្និសីទសារព័ត៌មាននៅថ្ងៃទី២២ ខែសីហាថា ភាគីប្រទេសចិនបានអះអាងថា នឹងបន្តឃ្លាំមើលផលប៉ះពាល់លើប្រជាពលរដ្ឋខ្មែរនៅតាមព្រំដែន ហើយត្រៀមដាក់អ្នកសង្កេតការណ៍ឱ្យចូលរួមឃ្លាំមើលបទឈប់បាញ់។
អ្នកស្រី ម៉ាលី សុជាតា៖ «ស្ថានទូតចិនប្រចាំកម្ពុជាបានបញ្ជាក់ពីការត្រៀមខ្លួនចូលរួមជាអ្នកសង្កេតការណ៍ ជួយដល់ផ្នែកបច្ចេកទេស ដើម្បីចូលរួមចំណែកក្នុងការគាំទ្រការអនុវត្តបទឈប់បាញ់របស់កម្ពុជា-ថៃ ឈានដល់ការរកដំណោះស្រាយវិលត្រឡប់មកវិញនូវប្រក្រតីភាព»។
ការលើកឡើងនេះ ក្រោយពីប្រធានប្ដូរវេនអាស៊ានលោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម (Anwar Ibrahim) និយាយទូរស័ព្ទជាមួយនាយករដ្ឋមន្ត្រីស្ដីទីថៃលោក ភូមិថាំ វេឆាយ៉ាឆៃ (Phumtham Wechayachai) បានលើកឡើងពីគំនិតផ្ដួចផ្ដើមស្នើដាក់អ្នកសង្កេតការណ៍អន្តរជាតិ ដែលជាមន្ត្រីអនុព័ន្ធយោធាមកពីស្ថានទូតក្រៅពីប្រទេសជាសមាជិកអាស៊ាន ដើម្បីពង្រឹងការតាមដានបទឈប់បាញ់។
ប៉ុន្តែសំណើនេះ ត្រូវបាននាយករដ្ឋមន្ត្រីស្ដីទីថៃបដិសេធ និងចាត់ទុកថា ការបន្ថែមចំនួនអ្នកសង្កេតការណ៍បទឈប់បាញ់ក្រៅពីអនុព័ន្ធយោធា និងមន្ត្រីស្ថានទូតអាស៊ាន ជាការជ្រៀតជ្រែតពីខាងក្រៅ ដោយអះអាងថា ជម្លោះព្រំដែននេះ ជាបញ្ហារបស់កម្ពុជា-ថៃ។
នៅថ្ងៃទី ២២ ខែសីហា ក្រសួងការពារជាតិកម្ពុជាបានប្រកាសពីលទ្ធផលនៃកិច្ចប្រជុំគណៈកម្មាធិការព្រំដែនរវាងមេបញ្ជាការភូមិទី៥របស់កម្ពុជាជាមួយមេបញ្ជាការភូមិភាគទី១របស់ថៃ ដែលបានប្ដេជ្ញាចិត្តបន្តអនុវត្តបទឈប់បាញ់ ដែលបានព្រមព្រៀងគ្នាតាមរយៈកិច្ចប្រជុំថ្នាក់នាយករដ្ឋមន្ត្រី និងរដ្ឋមន្ត្រីក្រសួងការពារជាតិនៃប្រទេសទាំងពីរ ព្រមទាំងខិតខំដោះស្រាយបញ្ហាដោយសន្ដិវិធី និងជៀសវាងការប៉ះទង្គិចគ្នាជាថ្មី។
ក្រសួងការពារជាតិបានបន្តថា នៅក្នុងកិច្ចប្រជុំនេះ មេបញ្ជាការភូមិភាគប្រទេសទាំងពីរ ក៏បានពិភាក្សាស្វែងរកដំណោះស្រាយលើសកម្មភាពទាហានថៃរាយបន្លាលួសនិងដាក់កង់ឡានរំលោភចូលបូរណភាពទឹកដីកម្ពុជា និងភូមិឋានពលរដ្ឋខ្មែរនៅតាមព្រំដែន។
ជាមួយគ្នានេះរដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិលោកប្រាក់សុខុនបានដឹកនាំសមាជិកអង្គទូតបរទេសចំនួន៤២ប្រទេសនិងទីភ្នាក់ងារអង្គការសហប្រជាជាតិចំនួន២២រូបចុះពិនិត្យផ្ទាល់ទីតាំងយោធាថៃចូលរាយបន្លាលួសកង់ឡាននិងសំណាញ់រនាំងពណ៌ខ្មៅនៅភូមិជោគជ័យឃុំអូរបីជាន់ស្រុកអូរជ្រៅខេត្តបន្ទាយមានជ័យនៅថ្ងៃទី២២ខែសីហា។ដំណើរទស្សនកិច្ចនេះធ្វើឡើងរយៈពេលពីរថ្ងៃនៅក្នុងខេត្តបន្ទាយមានជ័យឧត្តរមានជ័យនិងខេត្តសៀមរាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។